METAPHER

E Vase wo kaputt goht, cha mr zemelieme. Sie wird hebe. Du chasch wieder Blueme inestelle. Sie funktioniert und da eigentlich fast ohni Abstrich. Du wirsch ere aber ahgseh, dass sie irgendwie nüm ganz isch.

Wenn dr di glich Vase aber namal abekeit, denn chasch du versueche und versueche d Einzelteil wieder zemezlieme, es wird eifach schwierig. Es isch fast unmöglich. Du gisch dr aber verdammt viel Müeh, nimmsch dr Ziit, de besti Liem, denn es isch dini verdammt Lieblingsvase und du häsch dr bim erste mohl scho so Müeh geh, zum sie wieder anekriege, da dörf nöd umesüst gsi si.

Drum wird s unmögliche doch uf de erst Blick möglich. Du flicksch sie zeme. Sie wird aber Löcher ha. Ganz chlini. Fast nöd sichtbari. Es wird Wasser durelaufe, wenn sie füllsch. Nur Tröpfliwiis. Aber sie verlührt Wasser. Langsam, aber stetig. D Vase cha viellicht na hübsch im Regal stah, aber sie cha nüm eren eigentliche Zweck als Vase erfülle und mit dem isch d Vase und ere Bsitzer nöd vollends zfriede. Zumindest uf e langi Duur use nöd. Denn d Vase weiss, wa sie verlore het und wünscht sich die alt Ziit zruck und du musch schmerzhaft zueluege, dass all dini Bemüehige vom Flicke nöd zu 100 % glanget hend und du nüd me mache chasch.

Für de Moment passts aber. Me isch glücklich, dass mr sie wieder het chönne flicke. Me het Freud. Hoffnig, dass sie jetzt stabil blibt und me fründet sich au biz demit ah, dass sie nüm würkli als vollwertigi Vase benutzt cha werde. Wal me will sie ja nöd wegwerfe. Me will sich nöd devo trenne. Nöd nach all dene Bemüehige. Mit dem findet me sich ab. Me cha ahfangs demit lebe.

Aber irgendwenn...nach paar Monate oder sogar Johr goht da nüm, weil me i die Vase kei Blueme me stelle cha. Oder halt sus nur Kunstblueme. Me mue immer Kompromiss ihgo und me wird immer dra erinneret, dass sie kaputt isch, dass sie zweimal abekeit isch! Da passiert jedes mohl, wenn mr merkt, dass die Vase eifach kei ganzi Vase me isch und irgendwenn will mr sich demit nüm z friede geh und obwohl d Vase d Lieblingsvase isch und sie mit viel schöne Erinnerige verbunde isch, mue me sich irgendwenn eifach vo ere trenne, weil mr sus kei frischi Blueme me cha kaufe und ufstelle. Und da isch schlussendlich da, wa mr will, wenn mr e Vase hät - süst brücht mr keini. 

don't stress the could haves. if it should have, it would have. - unknown